" जीवन की दौड़ ऑर रुहानी नूर"

Jeevan me adhik kuchh karne ki umeed ne mujhe sunsaan si rah par nikaal diya,pata nahi mai kaha aur kis raah pe tha. Ek ansuna se mahaul me, shayad mai bevajah chalte ja raha tha. Pehli bar mujhe laga ki jo ho raha hai mai hi kar raha hu; Mai prassannchita ho, nirantar us anant path pe badhe hi ja raha tha. Tabhi,achanak! Mere piche se kisi ne mujhe pukara. Mai stabdh rah gaya jaise kisi ne range haatho pakad liya ho, mere nishthur paav jadvat ho gaye, mai chah kar bhi apne aap se puchh nahi saka ye kyu aur kya ho raha hai?

Mai darra sehma sochne laga kab aur kaise meri padgamini ne chapla ka roop dharan kiya aur aage badne ka apradh kiya ?? Shayad mujhe khabar hi nahi hue, naa yaad hi raha kuch, mai apne niruddheshya hone per vismit hua. Tabhi mere manas patal pe ek nanhi si aahat ne mujhe aabhas dilaya ki mujhe koi pukar raha hai. Mere to roye khade ho gaye pure badan me sihran daud gayi.

Ek ati vegmayi jhonke ne meri tandra k avaran se mujhe nikalte hue,us noor ko dekhne ka adesh diya.Mere taakne per vo kahne laga Arey! Kis raah pe nikla hai aur kaha jaana hai? Fir ek waqfe ke bad usne kaha mai sab janta hu tu kis firaaq me rehta hai, mai hi us ka sabab hu, mai hi tera wajood hu, dhund ke hizab me dhaka teri rooh ka noor hu,Abhi rukana nahi abhi tera waqt nahi aaya hai,Maine kaha tumne hi rukne ko kaha to wo bola "Mai chahta hu tum, chalo nahi daudo, tez raftar se daud lagao aur haan rukna nahi".

Uski baaton me koi jaadu tha sahasa hi mai daurne laga; ye kaun si disa hai? Kaun sa marg hai? Kis desh me, kab pahunchna hai? Usne mujhe na hi bataya aur na hi mere vivekyukt bodh ne usase puchha hi, Bin arth jaane mai yu hi nirantar daude jaa raha tha, jaanewo kaun si shakti thi?
Jo mujh me samai thi mujhe pata hi nahi, mere jeevan me pahli baar mere viruddha koi karya ho raha tha.Aaj bhi mai us mrigamarichika me fasa kuch paane ki aas me daude hi ja raha hu.per nahi yeh daud mahaz jeevan sangharsh hai jisme vijayi hone ki lalsaa hai.